趙連海怎樣由原告變被告

節錄網絡上發表過的一些言論。

01

結石寶寶之家發起人，毒奶受害人爸爸趙連海，被控「尋釁滋事罪」！不止唔准投訴，連呻下都唔得，都要「河蟹」埋你！呢個咩國家黎架！？不如改國號叫「中華河蟹共和國」 吧！慶幸我還在香港，才尚有一點僅有的自由氣息，這絕對不是理所當然，但也不用過份絕望。各位朋友，我相信只要我們把握每一個可以發聲的機會，就好似「扑傻瓜」咁，你河蟹到一個梁詠琪，河蟹到一個杜汶澤，我就唔信你河蟹到全世界！！

02

譚作人追查四川豆腐渣工程，被控「洩露國家機密罪」；劉曉波提出零八憲章倡議政治改革，被控「顛覆國家罪」；到今日，趙連海代表毒奶粉受害者家長申訴，被控「尋釁滋事罪」，判有期徒刑兩年半！呢一連串事件最荒謬的是，一大班豆腐渣工程主事人、毒奶粉公司高層、國家質檢總局的貪污官員，仍然逃之夭夭...憑良心說話的公民卻被困在共和國的牢獄裡。我想話：呢個國家真係有病！！而且係病入膏肓！！！！！！

03

睇到趙連海判監呢段新聞第一個反應都係好down，然後係好憤怒，心裡面咒罵了好多次XXX去死....我已經唔知點樣為呢個國家祈禱...為呢個國家求公義！？定係為XXX早日崩潰！？想到呢個政權每日霸佔著我所愛的國家，剝奪人民應有的各種自由....我真係好痛心....

04

趙連海事件愈來愈離譜！早前趙連海代表律師稱會替趙提出上訴，隨即就被公安軟禁，你今日就同我講趙連海畫押同意放棄代表律師！？這真是他自願，還是被迫放棄上訴權利？還有新華社的奇文奇論，翻出趙連海擅闖民居及傷人的「舊帳」，力證當局是依法判決。我想問，就算這些「舊帳」真有其事，它跟今天的判決有關係嗎？「大國」已經崛起...崛起成為納粹德國！！… …

其實唔單止係司法制度出問題，係整個制度都有問題，否則不會有「尋釁滋事罪」呢類無無謂謂的莫須有罪，也不會有新華社這類宣傳組織公然出來無的放矢破壞司法獨立。根本整個制度就賦予統治者至高無上不被制衡的權力。

.