對面的1B看過來

又係3M班際比賽，無獎拎，大家議論紛紛：「如果不是d人淆底縮到咁後…」「如果不是阿邊個唱錯beat…」「如果不是超時扣分…」「如果不是第一班表演…」「一早就話跳sorry sorry啦…」講就天下無敵，哈哈，做就有心無力啦！！

其實有獎無獎又有乜所謂？最重要是看見不少同學主動出謀劃策，或有默默參與，也總算一種欣慰。記得開初，有同學提議跳舞：「Sorry Sorry啦...」得個講字，事當然不成。自己做過學生，都明白的，誰提出意見，誰就很大機會要擔綱撐大旗，以學生「多一事不如少一事」理念來說(其實成人亦然)，就不如算罷。這種班際表演，要同時間符合全班38人的期望，又願意一同出來做場「馬騮戲」，任誰領軍都是吃力不討好。你說跳舞好嘛，總有人不願意跳。死都要我跳！？Hea住黎跳囉！！如果班上有咁肯蝕底的同學，願意幫助你一力承擔諗計，尤其是初中班主任，你真要好好對待那位同學，他真的很難得很「另類」，百人難得一遇了！

所以呢，後來有同學主動改編歌詞、參與排練跳舞、拍攝及剪片、整PPT等等，我都覺得「收貨」了，很感謝他們。當然更要感謝那位犧牲色相的Lady Ben Ben，佢在片尾出場騷首弄姿，真係嚇到我暈低，十個嘔吐袋也不夠！佩服！佩服！我給你的演出101分！！其實，這個活動也是對我的考驗，按著同學不同的專長和興趣，編排合適他們的崗位，就是我們班主任的工作。當然班主任有時會「走漏眼」，但這些表演活動，總會有些平日「唔聲唔聲」的同學冒起頭來，某些才能會被發掘。

今年1B班真係有好多奇人異士，但係他們本質不壞。每個人總有反叛一面，也有軟弱一面；有淫邪一面，也有善良一面。作為班主任，我最希望做到和享受就是與學生「同行」，可能係抽額外時間指導功課，可能係一齊經歷練習跳舞，可能係拉佢埋一邊講下人生道理。作為老師和家長，可能我們對小朋友都太多責罵，太少聆聽；太多命令，太少傾心底話；太多要求，太少同行。

其實我也在學習中，這是永遠上不完的課。
.